الإعلامى هانى عبد الكريم يكتب عن ولاد اللذينة

حاولت اكتب شيئ يغير الواقع بصراحه الواقع نفسه اتصل عليه وقالي هتسكت ولا اقع عليك قولتله علي ايه ياعم قلبك ابيض اسكت احسن بس بصراحه مقدرتش ما انتوا كمان مستفزين جدا شغالين كتابه ليل نهار وتقولوا نهايه العالم الاربعه والعشرون ساعه الفاضله في عمر العالم مع أن الخناقه بين كوكو وماما بصوا انا احيلكم الحكايه ماما خدت بيت جديد فحبت تثبت وجودها في المنطقه بقي لمت غطيان الحلل اللي في البيت وشويه الشوك والسكاكيين اللي حيلتها وشويه المعالق وكل حاجه بتعور والسلام واصلا ابويه ماضي علي قائمه بالحاجه دى وممكن تحبسه تاني يوم بس ما علينا نزلت الحجه الشارع وشمرت دراعها ويعلو صوتها يا ارض اتهدي ماعليكي قدي بصراحه الناس اعتبرتها مجنونه ومردوش كتر خيرهم لكن اللي زاد المبله طين لما قالت ايه يا منطقه يامعفنه يلي مش فيكي ست تملي عيني وهنا مربط الفرس بقي خالتي الحجه كوكو بقي اللي ساكنه في اخر الشارع بعيد ودي ست مفتريه وجوزها جزار ومعروف انها متهورة ومجنونه مفيش عقل اساسا لمت هيه كمان الاسلحه بتعتها ونزلت الشارع وشمرت دراعها ويعلو صوتها برضو ايه يابت انتي مين اللي معفنه يلي ويلي وردحت لها بقي وقالت لها لو جوزك راجل قربي هنا وانا اعجنك طبعا الحاجه ماما ماكنتش متوقعه حد يرد عليها المفاجئه صدمتها راحت واقفه مكانها وشغالين ردح لبعض راحت الحاجه كوكو قائله اوعي يابت تفكرينا زي الجماعه العرب اللي انتي كل شويه تضربي واحده فيهم لا حاسبي ده انا لا اي اي ولا زيي زيي يا حبيبتي ده انا احرقك وانتي واقفه طبعا تدخل ولاد الحلال اللي حبوا يهدوا الموضوع فكان الحج دب الكبير دور مؤثر الصراحه وبعدين دخل الديك في سياق الموضوع واتضح انهم معرفه قديمه والموضوع بس استعراض عضلات ولا فيه خناقه ولا حاجه من اساسه والناس اللي كانت واقفه تتفرج واللي كان واخد ساتر كله قعد يخبط كف علي كف ويقول يا ولاد اللذينه بس ادي الحكايه بقلم الساخر هاني عبدالكريم الشخصيات ماما امريكا وخالتي كوكو كوريا الشماليه الدب الكبير روسيا الديك فرنسا #